Chapter 135

A can New G.R.A kuwa kasan cewar yau girkin Mamane dan Mamy yau ta ƙare kwana biyunta. Suna dawowa sallan isha Ahmad da Habu sukayi cikin gida. Da sauri Habu ya tsaya, cikin mamaki yace. "Ya Ahmad kalli can." Da sauri Ahmad ya isa wurin da Habu ke nuna mishi, ganin kayan lefen Zaleeha ne da aka kawo jiya watse aƙasa, setin gaba ɗaya akwatuna 30 dasu tarkacen gishiri da goro duk an watsosu waje, cikin tsananin Al'ajabin halin Mama da tsaurin ido irin nata yace. "Innalillahi! Habu tayani mu kwashesu, tunkan Baba Malam yazo yagani, nasan bazaiji daɗi ba aransa ba." Da sauri suka fara tattara kayan, sai kuma duk suka tsaya tare dayin shiru, sakamakon jin muryar mahaifinsu ta window parlour'n shi. "Ku barsu a wurin ko tsinke kada ku ɗaga, ku wuce ku bar wurin." Shiru sukayi cikin tsananin tarin damuwa dan dagajin muryar Baba malam yana cikin tsananin baƙin ciki, muryarshin ce ta katse musu tunanin da sukeyi. "Ku bar wurin ko nace!." ya ƙarishe maganar cikin bada umarni irin na fusata. Da sauri sukace. "Toh". sannan suka juya, kowa ya nufi ɗakin mahaifiyarshi. Gefen Mamy Ahmad ya zauna cikin ƙunan rai yace. "Please Mamy kije ki bawa Baba malam haƙuri, naga ranshi ya matuƙar ɓaci, kice yayi haƙuri ya barmu mu kwashi kayan, in yaso mushigo dashi nan ɗakinki." Murmushi Mamy tayi tare da cewa. "Hmmm Ahmad ai wannan ba hurumi na bane, ku bar kayan kamar yadda ya umarceku, Mamanku ta zauna da Malam kusan tsawon shekaru 30 kenan yau, amman har yau bata san waye Malam ba, bata taɓa ƙureshi ba, amman da dukkan alama yau zata san kaɗan daga cikin halaiyarsa, idan ransa ya ɓaci, shi acikin ruwan sanyi zai dafata." Jin haka yasanya Ahmad cewa. "Hmmm kai Mama tanada matsala Wallahi, mutum duk haƙurinshi sai ta ƙureshi." "Kaje kaci abinci ka dena zama da yunwa." Mamy ta umarceshi cikin son kauda zancen, kasancewar bata son tayi mgnar kishiyarta, dan wannan shi ke ɓata alaƙar zuciyar yaro da matar ubanshi. Ƙarfe tara dai-dai Mama ta shiga parlour'n Baba Malam, tare da yin sallama can ƙasan maƙoshi, ta yadda shi baima jitaba. A kan kujera ta sameshi zaune ya zubawa TV idanu yana kallon BBC News. Kan dinning table ta kai dubanta, gani tayi yanda ta ajiye abinci, yana nan ayanda yake, da alama babu wanda ya taɓa ko food flask ɗin bare akai ga ci, juyowa tayi ta maida kallonta kan fuskarshi da ta ɓoye ɓacin ransa, ta sani koda bazaici abinciba to tabbas zaisha tea, dan haka taku uku zuwa biyar ne yakaita gaban dinning area, cup ta ɗauka sannan ta haɗa mishi tea kamar yadda ta saba, a hankali tazo ta ajiye mishi cup ɗin a kan table ɗin dake gabanshi, wanda yawanci nan yake miƙe sawunshi idan yana zaune akan kujera. danne ɓacin ranta tayi dan yanzu so take ta gwada kirsa tunda taga hayagagar bata kamashi, gefenshi ta zauna tare da cewa. "Ga tea ɗinka nan nahaɗa ma kada yayi sanyi." shiru yayi baice ƙala ba, ganin yadda yayi kamar babu wani mahaluƙin dake kusa dashi, yasanya cikin tsareshi da ido taƙira sunanshi. "Malam!." Baima juyo ya kalleta ba bare tayi zaton ko zai amsa mata, saima kaɗa ƙafafunshi da ya farayi a hankali. shi kuwa wani irin tafarfasa zuciyarsa keyi, yadda tazo tayi ta mishi ihu da haushi a kanshi gaban yaranshi da uwar gidanshi, shine ke ƙara ɓata masa rai, sam bata sa hankali da nutsuwa cikin lamuranta. Kusa dashi ta kuma matsowa tare da cewa. "Malam magana nake so muyi da kai fa." Bai bi ta kantaba bare ya saurareta saima ƙara volume ɗin TV da yayi. Cikin takaicin abin tace. "Ya kamata muyi magana ta fahimtar juna, a bani matsayina da damata a matsayina na uwar yarinya, ni nasan Zaleeha bata son wannan nakasasshen, ta tsaida gwaninta, harma ta bashi daman ya turo komai na aure, tunda dama iyayenshi kam sun zo kuma ka sansu ba baƙin fuska bane, d'an manya ne gaba da bayansa." Gum yayi mata tamkar dutse, ita kuwa sai surutai takeyi uwa aku, ganin an gama labaran ne ya sashi, miƙewa tare da kashe TV sannan ya nufi bedroom ɗinsa, da sauri tabi bayanshi tana Magana, bai kulata ba, haka ya shiga bathroom, ruwa ya watsa sannan yayi al'wala kana ya fito. A bakin gado ya sameta tana zaune, shi kuwa shirin bacci yayi kana yazo ya tsaya gefenta, da hannu ya nuna mata hanyar fita alamun ta fice mishi daga ɗaki, fuska a tsuke tace. "Muyi maganar tukun!." Fuska ya kuma tsukewa wanda saida taji gabanta ya ɗan faɗi, yayinda zuciyarta kuwa ta buga da ƙarfi, hanyar fita ya kuma nuna mata, da sauri tace. "Dan Allah, dan darajar ma'aiki kayi haƙuri ka buɗi baki muyi magana." Ido ya rumtse dan ya rigada ta haɗashi da Allah. Itama sanin in dai ta haɗashi da Allah zai saurareta ne ya sata yin hakan. cikin kaushin murya da haɗe fuska zuciya na tafasa murya a zafafe yace. "Kije ki kwashi kayan da kika watsar ɗin ki maidasu ɗakinki ki ajiyesu yadda kika samesu." da sauri tace. "Dare yayi fa." A kausashe yace. "Baza kuma su kwana a waje ba." Cikin sanyin jiki tace. "To bari in ƙira Habu yazo ya kwashesu." A ƙufule yace. "Waya fito dasu?." Kai ta juya tare da cewa. "Ni ce." Cikin bada umarni yace. "To kije ki maidasu kizo muyi maganar." Bata da zaɓi dan ta san kaɗan kenan daga halinshi dole taje a daren ta kwashi kayan, ta maidasu cikin ɗakinta, tana gamawa a gajiye ta koma ɗakin nashi, a kwance ta sameshi cikin maida numfashi tace. "Na maidasu. Ka tashi muyi maganar." Kai ya jujjuya tare cikar haiba da isa da gidanshi yace. "Maganar ai na gamata babu wani wanda zan aurawa ɗiyata Zaleeha sai Saifuddeen, kuma babu wani mahaluƙin da ya isa hanani sai ubangijin daya halicceni!." Yana faɗin haka ya gyara kwanciyarshi tare da rufe ido alamun bacci zaiyi. Cikin tsananin takaici haɗi da ƙunci tace. "Ni kuwa Wallahi ƴata bazata auri gurgu kuma kurma ba, ɗiyata bazataje ta zama majinyaciya ina kallo da idona ba, sannan bazan taɓa bari takashe rayuwarta wajen kula da nakasasshe ƙaskantacce ba, Allah ya sauwaƙa ma, ni dai ajinina ban haifawa nakasashshe matar da zai aura ba ehe!!." Tana gama faɗin haka ta juya ta fita a fusace. Gyara kwanciya Baba Malam yayi tare da rufe idanunsa, sunayen Allah Kawai yake ambata acikin ransa. *** Washe gari kuwa Zaleeha daga gidan hajja Inna ma'aikatarsu ta nufa, bayan ta gabatar da shirinta na mushaƙata kai tsaye gidansu kuma ta nufa. A harabar gidan tayi kiciɓis da ya Ahmad, cikin shaƙuwarsu ta nufi inda yake, da alamun cewa shima yanzu shigowarsa cikin gidan. hannunshi ta kamo tare da cewa. "Ya Ahmad nayi kewarku kwana biyu bana nan ko kuyi cikiyata." murmushi yayi tare da cewa. "Muma munyi kewarki, kin san inata shirin tafiyarmu ne, naso in wuce da Lubna amman Mamy tace wai in bar miki ita." tsalle tayi cikin jin daɗi tace. "Yessss! My mamy kai amman ko naji daɗi sosai!!." Murmushi yayi tare da cewa. "Ato ai dama amare yan jin daɗine." Sam bata kawo komai